Bledar Çuçi

Minister

Bledar Çuçi

Z. Bledar Çuçi lindi në Tiranë më 14 nëntor 1970. Ai ka një djalë, Endi Çuçi.

Arsimimi

Z. Çuçi përfundoi studimet në shkollën e mesme të përgjithshme “Petro  Nini Luarasi” në Tiranë (1989); studimet e larta për drejtësi në Universitetin e Tiranës (1995) dhe studimet pasunversitare (Master) për menaxhim në Universitetin Hasselt në Belgjikë (1998).

Kariera profesionale dhe politike

Z. Çuçi ka shërbyer në administratën publike në qeveritë e udhëhequra nga Partia Socialiste (PS), ndër të tjera, si Kancelar i Gjykatës së Rrethit Tiranë në vitet 2000-2001. Ka qënë Këshilltar i Ministrit, Drejtor i Drejtorisë Juridike dhe Integrimit, dhe Sekretar i Përgjithshëm në Ministrinë e Pushtetit Vendor deri në fund të vitit 2005. Gjatë kësaj kohe Z. Çuçi ka qenë edhe përfaqësues i qeverisë shqiptare në Komitetin për Demokracinë Lokale dhe Rajonale të Këshillit të Europës, Strasburg (2003 – 2005); anëtar i Grupit Negociator të Shqipërisë lidhur me nënshkrimin e Marrëveshjes së Stabilizim Asocimit mes Shqipërisë dhe Komunitetit Europian (2003 - 2006) dhe anëtar i Bordit të Drejtorëve të Institutit për Trajnimin e Administratës Publike në Shqipëri (2003 – 2005)

Gjatë viteve 2006 - 2010, z. Çuçi ka punuar si ekspert i pavarur për çështje të administratës publike, të reformës në drejtësi dhe të kuadrit ligjor për biznesin në programe të financuara nga Agjencia Amerikane për Zhvillim Ndërkombëtar (USAID), Departamenti për Zhvillim Ndërkombëtar i Mbretërisë së Bashkuar (DfID), Programi i Kombeve të Bashkuara për Zhvillim (UNDP) dhe Bashkimi Europian (BE) në Shqipëri dhe Kosovë. Në vitet 2010 - 2011, z. Çuçi ka qënë Drejtori Ekzekutiv i Shoqatës për Autonominë Vendore.

Z. Çuçi u aktivizua me strukturat drejtuese të PS-së që prej vitit 2007, kur u zgjodh anëtar i Asamblesë Kombëtare të PS-së dhe kryetar i Komisionit të Asamblesë për Çështjet e Pushtetit Vendor. Ai u rizgjodh anëtar i Asamblesë së partisë edhe në vitin 2011. Nga nëntori 2011 deri në gusht 2012, z. Çuçi ishte ekspert i PS-së në Komisionin e Posaçëm Parlamentar për Reformën Zgjedhore. Që prej shkurtit 2012 ai mban detyrën e Nënsekretarit për Çështjet Zgjedhore në PS.

Trajnime të tjera

Z. Çuçi ka ndjekur një seri kursesh e trajnimesh profesionale lidhur me administrimin e sistemit gjyqësor, prokurimet publike, mrojtjen e mjedisit dhe menaxhimin e administratës publike të organizuara nga Banka Botërore, Bashkimi Europian, USAID dhe qeveria italiane në Shqipëri, Lituani, Greqi, Itali e disa vende të tjera.

Gjuhët e huaja

Z. Çuçi zotëron gjuhën angleze dhe atë italiane.

 

Mbledhjet e Qeverisë